Summario
Iste specification defini XHTML 1.0, un reformulation de HTML 4 como un application
XML 1.0, e tres definitiones de typo de documento (DTDs) correspondente a illos definite per HTML 4. Le semantica
del elementos e lor attributos es definite in le Recommendation del W3C pro
HTML 4. Iste semantica forni le fundation pro le futur extensibilitate
del XHTML. Le compatibilitate con interpretes HTML es possibile gratias al observantia
de un micre collection de directivas.
Stato de iste documento
Iste section describe le stato de iste documento al momento de su publication.
Altere documentos pote substituer iste documento. Le ultime stato de iste serie
de documentos es mantenite al W3C.
Iste documento ha essite revidite per membros del W3C e altere interessatos
e ha essite indorsate per le Director como un Recommendation del W3C. Illo es
un documento stabile e pote esser usate como un material de referentia o citate
como un referentia normative in altere documentos. Le rolo del W3C in facer
le Recommendation es attraher le attention al specification e promover su ample
adoption. Illo extende le functionalitate e interoperabilitate del Web.
Iste documento ha essite producite como parte del Activitate
de W3C pro le HTML. Le objectivos del Gruppo
de Travalio de HTML (de accesso
exclusive a su membros) es discutite in le charta
del Gruppo de Travalio de HTML (de
accesso exclusive a su membros).
Un lista del Recommendationes actual del W3C e altere documentos technic es
disponibile a http://www.w3.org/TR.
Discussiones public super topicos relative al HTML occurre in le lista de discussion www-html@w3.org
(archivo).
Per favor relata errores in iste documento a www-html-editor@w3.org.
Le lista de errores cognite in iste specification es disponibile a http://www.w3.org/2000/01/REC-xhtml1-20000126-errata.
XHTML es un familia de modulos e typos de documento actual e futur que reproduce,
incorpora, e extende HTML 4 [HTML]. Le typos de
documentos del familia XHTML es basate super XML,
e es concipite finalmente pro functionar in conjunction con interpretes batase
super XML. Le detalios de iste familia e su evolution es discutite in plus detalios
in le section super futur lineas de action.
XHTML 1.0 (iste specification) es le prime typo de documento del familia XHTML.
Illo es un reformulation de tres typos de documento HTML 4 como applicationes
de XML 1.0 [XML]. Illo ha essite concipite pro esser
utilizate como un linguage de contento que es conforme al XML e, si alcun directivas
simple es observate, functiona in interpretes conforme al HTML 4. Le disveloppatores
qui migrara lor contento a XHTML 1.0 va notar le sequente beneficios:
- Le documentos XHTML es conforme al XML. Como tal, illos es promptemente
visualizate, editate, e validate con instrumentos de XML standard.
- Le documentos XHTML pote esser scripte pro operar de maniera equal o melior
que illos lo faceva anteriormente in interpretes conforme a HTML 4 assi
como in nove interpretes conforme a XHTML 1.0.
- Le documentos XHTML pote utilizar applicationes (p.ex. scripts e applets)
que se basa super le Modello de Objectos de Documento de HTML o le Modello
de Objectos de Documento de XML [DOM].
- In parallelo con le evolution del familia XHTML, le documents conforme a
XHTML 1.0 sera plus passibile de interoperar intra e inter varie ambientes
XHTML.
Le familia XHTML es le proximo passo in le evolution del Internet. Migrante
verso XHTML hodie, le disveloppatores de contento pote entrar in le mundo del
XML con tote su beneficios aggregate, remanente intertanto confidente in le
compatibilitate futur e passate de lor contento.
HTML 4 [HTML] es un application SGML (Standard Generalized
Markup Language) conforme al Standard International ISO 8879, e es amplemente considerate como le linguage
standard de publication del World Wide Web.
SGML es un linguage pro le description de de linguages de marcatores, particularmente
aquelles utilizate in le excambio de documentos electronic, gestion de documentos,
e publication de documentos. HTML es un exemplo de un linguage definite in SGML.
SGML es utilizate desde le medietate del annos 80 e ha and remanite assatis
stabile. Un grande parte de iste stabilitate se debe al facto que le linguage
es ric in functionalitates e flexibile. Totevia, iste flexibilitate ha un precio,
e le precio es un nivello de complexitate que ha inhibite su adoption in diverse
ambientes, inclusive le World Wide Web.
HTML, secundo su conception original, serea un linguage pro le excambio de
documentos scientific e altere typos de documentos technic, adequate al utilization
per non-specialistas in tractamento de documentos. HTML ha attaccate le problema
del complexitate de SGML per medio del specification de un micre collection
de etiquettas structural e semantic adequate pro le creation de documentos relativemente
simple. Ultra le simplification del structura del documentos, HTML ha incorporate
le supporto a hypertexto. Le supporto a multimedia ha essite incorporate posteriormente.
In un curte spacio de tempore, HTML ha devenite multo popular e rapidemente
ha superate su proposito original. Desde le inception de HTML, multe nove elementos
ha essite rapidemente inventate pro utilization intra HTML (como un standard)
e pro le adaptation de HTML a mercatos vertical e altemente specializate. Iste
superabundantia de nove elementos ha apportate problemas de compatibilitate
de documentos inter platteformas differente.
Con le rapide proliferation del heterogeneitate de software e platteformas,
il es clar que le adequation del HTML 4 "classic" pro utilization
in iste platteformas es aliquanto limitate.
XML™ es le abbreviation de linguage de marcatores extensibile (Extensible
Markup Language), [XML].
XML ha essite concipite como un medio de recuperar le poter e le flexibilitate
de SGML, eliminante un grande parte de su complexitate. Malgrado esser un forma
restricte de SGML, XML preserva grande parte del poter e ricchessa de SGML,
e retene tote le characteristicas de SGML commumente utilizate.
Durante que illo retene iste characteristicas benefic, XML elimina multes del
characteristicas le plus complexe de SGML que rende difficile e costose le creation
e le projecto de software adequate.
Le beneficios de migrar verso XHTML 1.0 es descripte supra. Alcunes del beneficios
de migrar verso XHTML in general es:
- Le disveloppatores de documentos e interpretes discoperi constantemente
nove manieras de exprimer lor ideas per medio de nove marcatores. In XML,
es relativemente facile introducer nove elementos o attributos de elementos.
Le familia XHTML es concipite pro accommodar iste extensiones per medio de
modulos XHTML e technicas pro disveloppar nove modulos conforme a XHTML (describite
in le veniente specification super modularization de XHTML). Iste modulos
va permitter le combination de collectiones de functionalitates nove e ja
existente durante le disveloppamento de contento e le creation de nove interpretes.
- Constantemente se crea manieras alternative de accessar le Internet. Alcun
estimationes indica que in le anno 2002, 75% del visualization de documentos
super le Internet occurrera super platteformas alternative. Le familia XHTML
es concipite tenente in mente le interoperabilitate general inter interpretes.
Per medio de un nove mechanismo de assignation de profilos a interpretes e
documentos, le servitores, proxies, e interpretes sera capace de realizar
le transformation le plus efficace possibile del contento. Al fin, sera possibile
disveloppar contento conforme a XHTML que sia usabile per qualcunque interprete
conforme a XHTML.
Le terminos sequente es utilizate in iste specification. Iste terminos extende
le definitiones in [RFC2119] basante se super definitiones
similar in ISO/IEC
9945-1:1990 [POSIX.1]:
- Definite per le implementation
- Un valor o comportamento es definite per le implementation quando le implementation
es responsabile pro le definition [e documentation] del requisitos correspondente
pro le correcte construction del documentos.
- Pote
- Con respecto a implementationes, le parola "pote" introduce un characteristica
optional que non es exigite per le specification, ma pote esser fornite. Con
respecto al requisitos pro le conformitate de documentos,
le parola "pote" significa que le characteristica optional non debe esser
utilizate. Le termino "optional" ha le mesme definition que "pote".
- Debe
- In iste specification, le parola "debe" introduce un requisito
obligatori in le implementation o in le documentos XHTML strictemente conforme,
dependente del contexto. Le termino "debera" ha le mesme definition
que "debe".
- Reservate
- Un valor o comportamento es non specificate, ma non es permittite su utilization
per documentos conforme o su supporto per interprete conforme.
- Deberea
- Con respecto a implementationes, le parola "deberea" introduce
un recommendation de implementation, ma non un requisito. Con respecto a documentos,
le parola "deberea" introduce un practica de programmation recommendate
pro documentos e un requisito pro documentos XHTML strictemente conforme.
- Supportate
- Alcun characteristicas in iste specification es optional. Si un characteristica
es supportate, illo se comporta como specificate per iste specification.
- Non-specificate
- Quando un valor es non-specificate, le specification determina nulle requisitos
de portabilitate pro un ressource o un implementation mesmo quando un documento
presenta le ressource. Un documento que require un comportamento specific
in un tal situation, in vice de tolerar qualcunque comportamento durante le
uso de aquelle ressource, non es un documento XHTML strictemente conforme.
- Attributo
- Un attributo es un parametro de un elemento declarate in le DTD. Le typo
e intervallo de valores de un attributo, inclusive un possibile valor per
defecto, es defite in le DTD.
- DTD
- Un DTD, o definition de typo de documento, es un collection de declarationes
XML que, como un collection, defini le structura legal, elementos,
e attributos que es disponibile pro utilization
in un documento que se conforma al DTD.
- Documento
- Un documento es un catena de datos que, post esser combinate con qualcunque
altere catenas que illo referentia, es structurate de maniera que illo porta
information contenite in elementos que es organizate
conforme le definition in le DTD associate. Vide
requisitos de conformitate pro documentos pro plus
informationes.
- Elemento
- Un elemento es un unitate structural de un documentos, que ha essite declarate
in le DTD. Le modello de contento del elemento es
definite in le DTD, e semanticas additional pote
esser definite in le description detaliate del elemento.
- Ressources (Facilities)
- Le functionalitates comprehende elementos, attributos,
e le semantica associate a illos. Quando un implementation
supporta aquelle functionalitate, uno dice que illo forni le ressources necessari.
- Implementation
- Un implementation es un systema que forni un collection de ressources
e servicios que supporta iste specification. Vide requisitos
de conformitate pro interpretes pro plus informationes.
- Analyse (Parsing)
- Le analyse es le processo per medio del qual un documento
es examinate, e le information contenite in illo es filtrate in le contexto
del elementos in le quales le information es structurate.
- Presentation (Rendering)
- Presentation es le processo per medio del qual un documento
es presentate. Iste presentation es facite in le forma le plus appropriate
al ambiente (p.ex. de maniera auditive, visual, impresse).
- Interprete (User Agent)
- Le interprete es un implementation que recupera
e processa documentos XHTML. Vide requisitos de conformitate
pro interpretes pro plus information.
- Validation
- Validation es un processo per medio del qual un documento
es confrontate con le DTD associate, assecurante
que le structura, le uso de elementos, e le uso
de attributos es de accordo con le definitiones
presente in le DTD.
- Ben-formate
- Un documento es ben-formate quando illo es structurate
de accordo con le regulas definite in le section
2.1 del recommendation XML 1.0 [XML]. Basicamente,
iste definition determina que le elementos, delimitate per lor etiquettas
de initio e de fin, sia correctemente annidate le unes intra le alteres.
Iste version de XHTML forni un definition de documentos XHTML strictemente
conforme, que es restricte a etiquettas e attributos del spatio nominative de
XHTML. Vide le section 3.1.2 pro information a proposito
del uso de XHTML con altere spatios nominative, per exemplo, pro includer metadatos
expresse in RDF intra documentos
XHTML.
Un documento XHTML strictemente conforme XHTML es un documento que require
solmente le ressources definite como obligatori in iste specification. Un tal
documento debe satisfacer tote le criterios sequente:
-
Illo debe esser valide secundo un del tres DTDs disponibile in le appendice A.
-
Le elemento-radice del documento debe esser <html>.
-
Le elemento-radice del documento debe designar le spatio nominative XHTML
usante le attributo xmlns [XMLNAMES].
Le spatio nominative pro XHTML es definite como http://www.w3.org/1999/xhtml.
-
Il debe haber un declaration DOCTYPE in le documento ante le elemento-radice.
Le identificator public includite in le declaration DOCTYPE debe referentiar
un del tres DTDs disponibile in le appendice A
utilizante le Identificator Public Formal respective. Le identificator del
systema debe esser cambiate pro reflecter le conventiones del systema local.
<!DOCTYPE html
PUBLIC "-//W3C//DTD XHTML 1.0 Strict//EN"
"DTD/xhtml1-strict.dtd">
<!DOCTYPE html
PUBLIC "-//W3C//DTD XHTML 1.0 Transitional//EN"
"DTD/xhtml1-transitional.dtd">
<!DOCTYPE html
PUBLIC "-//W3C//DTD XHTML 1.0 Frameset//EN"
"DTD/xhtml1-frameset.dtd">
Ecce un exemplo de un documento XHTML minime.
<?xml version="1.0" encoding="UTF-8"?>
<!DOCTYPE html
PUBLIC "-//W3C//DTD XHTML 1.0 Strict//EN"
"DTD/xhtml1-strict.dtd">
<html xmlns="http://www.w3.org/1999/xhtml" xml:lang="ia" lang="ia">
<head>
<title>Bibliotheca Virtual</title>
</head>
<body>
<p>Translatate a <a href="http://vlib.org/">vlib.org</a>.</p>
</body>
</html>
Nota que, in iste exemplo, le declaration XML es includite. Un declaration
XML como iste supra non es requisite in tote le documentos XML. Totevia, se
recommenda fortemente que le autores de documentos XHTML usa declarationes XML
in tote lor documentos. Un tal declaration es requisite quando le codification
de characteres del documento non es UTF-8 or UTF-16, le codificationes assumite
per defecto.
Le spatio nominativo de XHTML pote esser utilizate con altere spatios nominative
XML como indicate per [XMLNAMES], ben que tal documentos
non es documentos XHTML 1.0 strictemente conforme secundo le definition supra.
Le travalios futur del W3C va tractar de manieras de specificar requisitos de
conformitate pro documentos involvente multiple spatios nominative.
Le exemplo sequente monstra como XHTML 1.0 poterea esser usate in conjunction
con le recommendation MathML:
<html xmlns="http://www.w3.org/1999/xhtml" xml:lang="ia" lang="ia">
<head>
<title>Un exemplo mathematic</title>
</head>
<body>
<p>Le sequente usa marcatores del MathML:</p>
<math xmlns="http://www.w3.org/1998/Math/MathML">
<apply> <log/>
<logbase>
<cn> 3 </cn>
</logbase>
<ci> x </ci>
</apply>
</math>
</body>
</html>
Le exemplo sequente monstra como marcatores XHTML 1.0 poterea esser incorporate
in altere spatio nominative XML:
<?xml version="1.0" encoding="UTF-8"?>
<!-- initially, the default namespace is "books" -->
<book xmlns='urn:loc.gov:books'
xmlns:isbn='urn:ISBN:0-395-36341-6' xml:lang="ia" lang="ia">
<title lang="en">Cheaper by the Dozen</title>
<isbn:number>1568491379</isbn:number>
<notes>
<!-- utiliza le spatio nominative HTML
pro adder un commentario bypertextual -->
<p xmlns='http://www.w3.org/1999/xhtml'>
Tamben disponibile <a href="http://www.w3.org/">in linea</a>.
</p>
</notes>
</book>
Un interprete conforme debe satisfacer tote le criterios sequente:
- Pro esser consistente con le recommendation XML 1.0 [XML],
le interprete debe analysar un documento XHTML e verificar si illo es ben-formate.
Si le interprete declara esser un interprete validator, illo debe tamben validar
documentos contra lor DTDs referentiate de accordo con
[XML].
- Quando le interprete declara supportar ressources
definite in iste specification o requisite per iste per medio de referentia
normative, illo debe facer lo de maniera consistente con le definition del
ressources.
- Quando un interprete processa un documento XHTML como XML generic, illo
debera solmente recognoscer attributos del typo
ID (p.ex., le
attributo id in le majoritate del elementos XHTML) como identificatores
de fragmentos.
- Si un interprete incontra un elemento que illo non recognosce, illo debe
presentar le contento del elemento.
- Si un interprete incontra un attributo que illo non recognosce, illo debe
ignorar tote le specification del attributo (i.e., le attributo e su valor).
- Si un interprete incontra un valor de attributo que illo non recognosce,
illo debe utilizar le valor per defecto del attributo.
- Si illo incontra un referentia de entitate (differente del entitates predefinite)
pro le qual le interprete ha processate nulle declaration (lo que poterea
occurrer si le declaration es in le subcollection externe que le interprete
non ha legite), tote le referentia de entitate deberea esser presentate como
le characteres (comenciante con le ampersand e finiente con le puncto-e-virgula)
que compone le referentia de entitate.
- In presentar contento, le interpretes que incontra characteres o referentias
de entitate de character que es recognite ma non presentabile deberea monstrar
le documento de maniera que resta obvie al utilizator que le presentation
normal non ha occurrite.
- Le characteres sequente es definite in [XML] como characters de spatio in
blanco:
- Spatio ( )
- Tabulation (	)
- Retorno de carro (
)
- Avantiamento de linea (
)
Le processator XML normaliza le codices de fin de linea de differente systemas
in un unic character de avantiamento de linea, que es passate al application.
In ultra, le interprete XHTML debe tractar le sequente characteres como
spatio in blanco:
- Avantiamento de pagina ()
- Spatio de largor nulle (​)
In elementos ubi le attributo 'xml:space' es definite como 'preserve',
le interprete debe lassar tote le characteres de spatio in blanco intacte
(con le exception del characteres de spatio in blanco in le initio e in
le fin, que deberea esser eliminate). De altere maniera, le spatio in blanco
es tractate de accordo con le sequente regulas:
- Tote spatio in blanco circumferente elementos de bloco deberea esser
eliminate.
- Commentarios es eliminate totalmente e non affecta le tractamento de
spatios in blanco. Un character de spatio in blanco in cata latere de
un commentario es tractate como duo characteres de spatio in blanco contigue.
- Spatios in blanco in le initio e in le fin intra un elemento de bloco
debe esser eliminate.
- Characteres de avantiamento de linea intra un elemento de bloco debe
esser convertite in un spatio (excepte quando le attributo 'xml:space'
es definite como 'preserve').
- Un sequentia de characteres de spatio in blanco debe esser reducite
in un unic character de spatio (excepte quando le attributo 'xml:space'
es definite como 'preserve').
- Con respecto al presentation, le interprete debe presentar le contento
de un maniera appropriate al lingua in le qual le contento es scripte.
In linguas cuje scripte principal es latin, le character de spatio de
ASCII es typicamente usate pro codificar limites grammatical inter parolas
e le spatio typographic; in linguas cuje scriptura es affin al nagari
(p.ex., sanscrito, thailandese, etc.), le limites grammatical pote esser
codificate utilizante le character de 'spatio' ZW, ma normalmente illo
non sera representate per un spatio typographic in le resultato presentate;
le linguas que utiliza scripturas arabic pote codificar le spatio typographic
utilizante un character de spatio, ma illos pote equalmente utilizar le
character de spatio ZW pro delimitar limites grammatical 'interne' (lo
que a un oculo occidental resimila parolas in arabe frequentemente contine
varie parolas, p.ex., 'kitAbuhum' = 'kitAbu-hum' = 'libro les' = lor libro);
e linguas del tradition del scriptura chinese normalmente ni codifica
tal delimitatores ni usa le spatio typographic de iste maniera.
Le spatio in blanco in valores de attributo es processate de accordo con
[XML].
Debite al facto que XHTML es un application XML, certe practicas que era perfectemente
legal in le HTML 4 [HTML], basate super SGML,
debe esser cambiate.
Le concepto de documentos ben-formate ha essite introducite
per [XML]. Essentialmente isto significa que tote le
elementos debe haber un etiquetta de fin o esser scripte in un forma special
(descripte infra), e que tote le elementos debe annidar se.
Ben que le superposition de marcatores es illegal in SGML, illo era amplemente
tolerate per le navigatores actual.
CORRECTE: elementos annidate.
<p>ecce un paragrapho <em>emphatizate</em>.</p>
INCORRECTE: elementos superposite
<p>ecce un paragrapho <em>emphatizate.</p></em>
Le documentos XHTML debe utilizar minusculas pro tote le nomines de elementos
e attributos de HTML. Iste differentia es necessari perque XML sensibile al
majusculas e minusculas. Consequentemente, p.ex., <li> e <LI> es
etiquettas differente.
In HTML 4, basate super SGML, es permittite omitir le etiquettas de fin de
certe elementos; le apertura del elementos sequente representava un clausura
implicite. Iste omission non es permittite in XHTML, basate super XML. Tote
elementos, excepte aquelles declarate in le DTD como EMPTY debe
haber un etiquetta de fin.
CORRECTE: elementos terminate
<p>ecce un paragrapho.</p><p>ecce un altere paragrapho.</p>
INCORRECTE: elementos non-terminate
<p>ecce un paragrapho.<p>ecce un altere paragrapho.
Tote le valores de attributo debe esser ponite inter virgulettas, mesmo aquelles
que pare esser numeric.
CORRECTE: valores de attributo inter virgulettas
<table rows="3">
INCORRECTE: valores de attributo sin virgulettas
<table rows=3>
XML non supporta le minimization de attributos. Le pares attributo-valor debe
esser scripte integralmente. Nomines de attributo como compact
e checked non pote occurrer in elementos sin haber lor valor specificate.
CORRECTE: attributos non-minimizate
<dl compact="compact">
INCORRECTE: attributos minimizate
<dl compact>
Elementos vacue debe o haber un etiquetta de fin, o terminar lor etiquetta
de initio con />. Per exemplo, <br/> o <hr></hr>.
Vide directivas de compatibilitate con HTML pro obtener
informationes super manieras de assecurar le compatibilitate retroactive con
le interpretes de HTML 4.
CORRECTE: etiquettas vacue terminate
<br/><hr/>
INCORRECTE: etiquettas vacue non-terminate
<br><hr>
In le valores de attributo, le interprete debera eliminar spatios in blanco
del initio e del fin de valores de attributo e converter sequentias de un o
plus characteres de spatio in blanco (inclusive le avantiamentos de linea) in
un unic spatio inter parolas (un character de spatio de ASCII pro scripturas
occidental). Vide le section
3.3.3 de [XML].
In XHTML, le elementos script and style es declarate como elementos con contento
#PCDATA. Como resultato, < and &
sera tractate como le initio de un marcator, e entitates tal como <
e & sera recognoscite como referentias de entitate per
le processator de XML, e convertite a < e &
respectivemente. Involver le contento del elemento script o style con un section
marcate como CDATA evita le expansion de iste entitates.
<script>
<![CDATA[
... contento script non-processate ...
]]>
</script>
Le sectiones CDATA es recognite per le processator de XML e appare
como nodos in le Modello de Objectos de Documento, vide le section
1.3 del recommendation DOM nivello 1 [DOM].
Un alternativa es utilizar documentos externe de script e stilo.
SGML da al autor de un DTD le possibilitate de impedir que elementos specific
sia annidate in altere elementos. Tal prohibitiones (appellate "exclusiones")
non es possibile in XML.
Per exemplo, le DTD del HTML 4 stricte prohibe le annidamento de un elemento
'a' intra un altere elemento 'a' a qualcunque profunditate.
Non es possibile exprimer tal prohibitiones in XML. Ben que iste prohibitiones
non pote esser definite in le DTD, certe elementos non deberea esser annidate.
Un summario de iste typo de elementos e le elementos que non deberea esser annidate
in illos es disponibile in le appendice B,
que es normative.
HTML 4 ha definite le attributo name pro le elementos a,
applet, form, frame, iframe,
img, e map. HTML 4 tamben ha introducite le attributo
id. Iste duo attributos es concipite pro esser utilizate como identificatores
de fragmento.
In XML, le identificatores de fragmento es del typo ID, e il solo
pote haber un unic attributo del typo ID per elemento. Consequentemente,
in XHTML 1.0 le attributo id es definite con typo ID.
A fin de assecurar que le documentos XHTML 1.0 es documentos XML ben-structurate,
le documentos XHTML 1.0 DEBE utilizar le attributo id durante le
definition de identificatores de fragmento, mesmo pro elementos que historicamente
tamben habeva un attributo name. Vide le directivas
de compatibilitate con HTML pro obtener information super como assecurar
que tal ancoras sia retroactivemente compatibile durante le servicio de documentos
XHTML como typo de media text/html.
Nota que in XHTML 1.0, le attributo name de iste elementos es
formalmente deprecate, e sera eliminate in un version sequente de XHTML.
Ben que non il ha nulle obligation que le documentos XHTML 1.0 sia compatibile
con le interpretes actual, in le practica isto es facilemente realizabile. Directivas
pro crear documentos compatibile es disponibile in le appendice C.
In le momento del publication de iste recommendation, le etiquettage MIME general
recommendate pro applicationes basate super XML ancora debe esser resolvite.
Totevia, le documentos XHTML que observa le regulas definite in le appendice
C, "directivas de compatibilitate con HTML" pote esser etiquettate con le
typo de medio del Internet "text/html", viste que illos es compatibile con le
majoritate del navigatores HTML. Iste documento face nulle recommendation quanto
al etiquettage MIME del altere documentos XHTML.
XHTML 1.0 es le fundamento pro un familia de typos de documento que va extender
e definir subcollectiones de XHTML, a fin de supportar un ample varietate de
nove dispositivos e applicationes, definiente modulos e specificante un mechanismo
pro combinar iste modulos. Iste mechanismo permittera le extension e definition
de subcollectiones de XHTML 1.0 de maniera uniforme per medio del definition
de nove modulos.
A mesura que le utilization de XHTML se transfere del interpretes traditional
verso nove platteformas, es clar que non tote le elementos de XHTML sera necessari
in tote le platteformas. Per exemplo, un computator de tasca o un telephono
cellular pote supportar solmente un subcollection del elementos de XHTML.
Le processo de modularization divide XHTML in un serie de collectiones de elementos
minor. Iste elementos pote esser recombinate pro satisfacer le necessitates
de differente communitates.
Iste modulos sera definite in un documento posterior del W3C.
Le modularization apporta varie avantages:
-
Illo forni un mechanismo formal pro criar subcollectiones de XHTML.
-
Illo forni un mechanismo formal pro extender XHTML.
-
Illo simplifica le transformation inter typos de documento.
-
Illo promove le reutilization de modulos in nove typos de documento.
Un profilo de documento specifica le syntaxe e le semantica de un collection
de documentos. Le conformitate con un profilo de documento forni le base pro
garantir le interoperabilitate. Le profilo del documento specifica le ressources
requisite pro processar documentos de aquelle typo, p.ex., qual formatos de
imagine pote esser utilizate, nivellos de utilization de script, supporto a
folios de stilo, etc.
Pro creatores de productos isto permitte que varie gruppos defini lor proprie
profilo standard.
Pro autores isto evita le necessitate de scriber differente versiones de documentos
pro differente clientes.
Pro gruppos special tal como chimicos, medicos, o mathematicos, isto permitte
que un profilo special sia constructe per medio del utilization de HTML standard
plus un gruppo de elementos create specificamente pro le necessitates del specialista.
Iste appendice es normative.
Iste DTDs e collectiones de entitates constitue un parte normative de iste
specification. Le collection complete de fichieros DTD insimul con un declaration
XML e le Catalogo Aperte SGML es includite in le fichiero
zip de iste specification.
Iste DTDs se approxima al DTDs de HTML 4. Es probabile que quando le DTDs sera
modularizate, sera empleate un methodo de construction de DTDs que corresponde
plus intimemente con HTML 4.
Le collectiones de entitates XHTML es le mesmes que pro HTML 4, ma illos ha
essite modificate pro esser declarationes de entitate valide in XML 1.0. Nota
que le symbolo del moneta europee Euro (€ o €
o €) es definite como un parte del characteres special.
Iste appendice es normative.
Le elementos sequente ha prohibitiones quanto al elementos que illos pote continer
(vide de section 4.9). Iste prohibition se applica a tote
le profunditates de annidamento, i.e. illo include tote le elementos descendente.
a- non pote continer altere elementos
a.
pre- non pote continer le elementos
img, object, big,
small, sub, o sup.
button- non pote continer le elementos
input, select,
textarea, label, button, form,
fieldset, iframe o isindex.
label- non pote continer altere elementos
label.
form- non pote continer altere elementos
form.
Iste appendice es informative.
Iste appendice resume le directivas de projecto pro autores qui desira que
lor documentos XHTML sia presentate in interpretes HTML existente.
C.1 Instructiones de processamento
Sia consciente que instructiones de processamento es presentate in alcun interpretes.
Totevia, nota equalmente que quando le declaration XML non es includite in un
documento, le documento solo pote utilizar un del codificationes de characteres
per defecto, UTF-8 o UTF-16.
C.2 Elementos vacue
Include un spatio ante le / e > in le fin de elementos
vacue, p.ex., <br />, <hr />
e <img src="karen.jpg" alt="Karen" />.
Utiliza equalmente le syntaxe de etiquetta minime pro elementos vacue, p.ex.,
<br />, viste que le syntaxe alternative
<br></br> permittite per XML produce
resultatos inexpectate in multe interpretes existente.
C.3 Minimization de elementos e contento de elemento vacue
Date un instantia vacue de un elemento cuje modello de contento non es EMPTY
(per exemplo, un titulo o paragrapho vacue) non utiliza le forma minimizate
(p.ex. usa <p> </p> e non <p />).
C.4 Folios de stilo e scripts incorporate
Utiliza folios de stilo externe si tu folio de stilo utiliza <
o & o ]]> o --. Utiliza scripts
externe si tu script utiliza < o & o ]]>
o --. Nota que le analysatores XML ha le derecto de eliminar le
contento del commentarios, sin aviso. Consequentemente, le practica historic
de "occultar" scripts e folios de stilo intra commentarios pro render
le documentos compatibile con antique navigatores probabilemente non functionara
como expectate in implementationes basate super XML.
C.5 Avantiamentos de linea intra valores de attributos
Evita avantiamentos de linea e multiple characteres de spatio in blanco intra
valores de attributo. Illos es manipulate de manieras differente per differente
interpretes.
C.6 Isindex
Non include plus de un elemento isindex in le section head
de un documento. Le elemento isindex es disconsiliate in favor
del elemento input.
C.7 Le attributos lang e xml:lang
Utiliza le attributos lang e xml:lang pro specificar
le lingua de un elemento. Le valor del attributo xml:lang ha precedentia.
C.8 Identificatores de fragmento
In XML, le URIs [RFC2396]
que se termina con identificatores de fragmento del forma "#bla"
non se refere a elementos con un attributo name="bla"; in vice,
illos se refere a elementos con un attributo definite como de typo ID,
p.ex., le attributo id in HTML 4. Multe clientes HTML existente
non supporta le uso de attributos del typo ID de iste maniera,
alora valores identic debe esser fornite pro ambe attributos pro assecurar le
maxime compatibilitate con interpretes futur e passate (p.ex., <a
id="bla" name="bla">...</a>).
In ultra, perque le collection de valores legal pro attributos del typo ID
es multo minor que le collection de valores legal pro attributos del typo CDATA,
le typo del attributo name ha essite cambiate a NMTOKEN.
Iste attributo es limitate de maniera que illo solo pote haber le mesme valores
que le typo ID, o que le production Name in XML 1.0,
section 2.5, production 5. Infelicemente, iste limitation non pote esser exprimite
in le DTDs de XHTML 1.0. A causa de iste cambiamento, uno debe esser caute in
converter documentos HTML existente. Le valores de iste attributos debe esser
unic intra le documento, valide, e qualcunque referentias a iste identificatores
de fragmento (interne e externe) debe esser actualizate in le caso que le valores
se cambia durante le conversion.
Finalmente, nota que XHTML 1.0 ha disconsiliate le attributo name
del elementos a, applet, form, frame,
iframe, img, e map, e illo sera eliminate
del proxime versiones de XHTML.
C.9 Codification de characteres
Pro specificar un codification de characteres in le documento, utiliza simultaneemente
le specification de attributo de codification in le declaration xml (p.ex. <?xml
version="1.0" encoding="EUC-JP"?>) e un declaration meta http-equiv
(p.ex. <meta http-equiv="Content-type" content='text/html;
charset="EUC-JP"' />). Le valor del attributo de codification
del instruction de processamento xml ha precedentia.
C.10 Attributos boolean
Alcun interpretes HTML es incapace de interpretar attributos boolean quando
istes appare in lor forma complete (non-minimizate), como requirite per XML
1.0. Nota que iste problema non affecta interpretes conforme a HTML 4. Le sequente
attributos es involvite: compact, nowrap, ismap,
declare, noshade, checked, disabled,
readonly, multiple, selected, noresize,
defer.
C.11 Modello de objectos de documento e XHTML
Le recommendation de modello de objectos de documento nivello 1 [DOM]
defini interfacies del modello de objectos de documento pro XML e HTML 4. Le
modello de objectos de documento de HTML 4 specifica que nomines de elemento
e de attributo de HTML retorna in litteras majuscule. Le modello de objectos
de documento de XML specifica que nomines de elemento e de attributo retorna
como scripte in le documento. In XHTML 1.0, le elementos e attributos es specificate
in minusculas. Iste apparente differentia pote esser attaccate de duo manieras:
- Applicationes que accessa documentos XHTML servite como typo de medio de
Internet
text/html via le DOM
pote utilizar le DOM de HTML, e assegurar se assi que le nomines de elemento
e attributo sera retornate in majusculas per ille interfacies.
- Applicationes que accessa documentos XHTML servite como typos de medio de
Internet
text/xml o application/xml tamben pote
utilizar le DOM de XML. Le elementos e attributos retornara in minusculas.
Tamben, alcun elementos de XHTML pote o non apparer in le arbore de objectos
perque illos es optional in le modello de contento (p.ex. le elemento tbody
intra un table). Isto occurre perque in HTML 4 alcun elementos
poteva esser minimizate de maniera que lor etiquettas de initio e de fin era
omittite (un characteristica de SGML). Isto non es possibile in XML. In vice
de requirer que le autores de documentos insere elementos extranee, XHTML
ha rendite le elementos optional. Le applicationes debe adaptar se a isto.
C.12 Como utilizar ampersands in valores de attributos
Quando un valor de attributo contine un ampersand, illo debe esser exprimite
como un referentia de entitate de character (p.ex. "&").
Per exemplo, quando le attributo href del elemento a
se refere a un script CGI que recipe parametros, illo debe esser exprimite como
http://mi.sito.dom/cgi-bin/miscript.pl?classe=visitante&nomine=utilizator
in vice de http://mi.sito.dom/cgi-bin/miscript.pl?classe=visitante&nomine=utilizator.
C.13 Folios de stilo in cascada (CSS) e XHTML
Le recommendation de folios de stilo in cascada nivello 2 [CSS2]
defini proprietates de stilo que es applicate al arbore de analyse del documento
HTML o XML. Differentias in le analyse producera differente resultatos visual
o auditive, dependente del selectores utilizate. Le consilios sequente reducera
iste effecto pro documentos que es servite sin modification in ambe typos de
media:
- Folios de stilo CSS pro XHTML deberea utilizar nomines de elementos e attributos
in litteras minuscule.
- In tabellas, le elemento tbody sera inferite per le analysator de un interprete
de HTML, ma non per le analysador de un interprete de XML. Consequentemente
vos debe sempre adder explicitemente un elemento tbody si un selector CSS
face referentia a illo.
- Intra le spatio nominative de XHTML, uno expecta que le interpretes recognosce
le attributo "id" como un attributo de typo ID. Consequentemente, le folios
de stilo deberea esser capace de continuar a utilizar le syntaxe abbreviate
"#" del selector mesmo si le interprete non lege le DTD.
- Intra le spatio nominative de XHTML, uno expecta que le interpretes recognosce
le attributo "class". Consequentemente, le folios de stilo deberea esser capace
de continuar a utilizar le syntaxe abbreviate "." del selector.
- CSS defini differente regulas de conformitate pro documentos HTML e XML;
sia consciente que le regulas pro HTML se applica a documentos XHTML livrate
como HTML e le regulas pro XML se applica a documentos XHTML livrate como
XML.
Iste appendice es informative.
Iste specification ha essite scripte con le participation del membros del gruppo
de travalio pro HTML del W3C:
- Steven Pemberton, CWI (Presidente del Gruppo de Travalio pro HTML)
Murray Altheim, Sun Microsystems
Daniel Austin, AskJeeves (CNET: The Computer Network durante julio 1999)
Frank Boumphrey, HTML Writers Guild
John Burger, Mitre
Andrew W. Donoho, IBM
Sam Dooley, IBM
Klaus Hofrichter, GMD
Philipp Hoschka, W3C
Masayasu Ishikawa, W3C
Warner ten Kate, Philips Electronics
Peter King, Phone.com
Paula Klante, JetForm
Shin'ichi Matsui, Panasonic (ingeniero visitante del W3C durante septembre
1999)
Shane McCarron, Applied Testing and Technology (The Open Group durante augusto
1999)
Ann Navarro, HTML Writers Guild
Zach Nies, Quark
Dave Raggett, W3C/HP (guida del W3C pro HTML)
Patrick Schmitz, Microsoft
Sebastian Schnitzenbaumer, Stack Overflow
Peter Stark, Phone.com
Chris Wilson, Microsoft
Ted Wugofski, Gateway 2000
Dan Zigmond, WebTV Networks
Iste appendice es informative.
- [CSS2]
- "Cascading Style Sheets,
level 2 (CSS2) Specification", B. Bos, H. W. Lie, C. Lilley, I. Jacobs,
12 de maio 1998.
Ultime version disponibile a: http://www.w3.org/TR/REC-CSS2
- [DOM]
- "Document Object
Model (DOM) Level 1 Specification", Lauren Wood et al., 1 de octobre
1998.
Ultime version disponibile a: http://www.w3.org/TR/REC-DOM-Level-1
- [HTML]
- "HTML 4.01 Specification",
D. Raggett, A. Le Hors, I. Jacobs, 24 de decembre 1999.
Ultime version disponibile a:
http://www.w3.org/TR/html401
- [POSIX.1]
- "ISO/IEC 9945-1:1990 Information Technology - Portable Operating System
Interface (POSIX) - Part 1: System Application Program Interface (API) [C
Language]", Institute of Electrical and Electronics Engineers, Inc, 1990.
- [RFC2046]
- "RFC2046: Multipurpose Internet
Mail Extensions (MIME) Part Two: Media Types", N. Freed and N. Borenstein,
novembre 1996.
Disponibile a http://www.ietf.org/rfc/rfc2046.txt.
Nota que iste RFC rende obsolete RFC1521, RFC1522, e RFC1590.
- [RFC2119]
- "RFC2119: Key words for use
in RFCs to Indicate Requirement Levels", S. Bradner, martio 1997.
Disponibile a: http://www.ietf.org/rfc/rfc2119.txt
- [RFC2376]
- "RFC2376: XML Media Types",
E. Whitehead, M. Murata, julio 1998.
Disponibile a: http://www.ietf.org/rfc/rfc2376.txt
- [RFC2396]
- "RFC2396: Uniform Resource
Identifiers (URI): Generic Syntax", T. Berners-Lee, R. Fielding, L. Masinter,
augusto 1998.
Iste documento actualiza RFC1738 e RFC1808.
Disponibile a: http://www.ietf.org/rfc/rfc2396.txt
- [XML]
- "Extensible Markup
Language (XML) 1.0 Specification", T. Bray, J. Paoli, C. M. Sperberg-McQueen,
10 de februario 1998.
Ultime version disponibile a: http://www.w3.org/TR/REC-xml
- [XMLNAMES]
- "Namespaces in
XML", T. Bray, D. Hollander, A. Layman, 14 de januario 1999.
Le spatios nominative de XML forni un methodo simple pro qualificar nomines
utilizate in documentos XML, associante los a spatios nomintive identificate
per URI.
Ultime version disponibile a:
http://www.w3.org/TR/REC-xml-names
